🏯🏯🏯🏯🏯🏯🏯🏯🏯🏯🏯🏯🏯မြောက်ဦးခေတ် တန်ခိုးအာဏာစက်ကြီးမားသော ဘုရင်မင်းဗာကြီး နန်းတက်သည့်အခါ ကုသိုလ်တော်အဖြစ် ကျောက်တောင်များကို ဂူထွင်း၍ လှိုဏ်ဂူကြီးကိုးလုံး၌ ဘုရားတည်ခဲ့သည်။ ၎င်းတို့မှာ . . .
(၁)#ကျောက်တစ်လုံးဂူ၊
(၂)#နတ်တောင်ပြင်ဂူ၊
(၃)#တောင်ညိုဂူ၊
(၄)#ကြိမ်ခွေမော်ဂူ၊
(၅)#ဂူဝဂူ၊
(၆)#ဇီးကိုင်းဂူ
(၇)#ကူတောင်ဂူ၊
(၈)#နိုင်ငံတောင်ဂူ၊
(၉)#ပိုးရှီပြင်ဂူတို့ ဖြစ်သည်။
(၁)#ကျောက်တစ်လုံးဂူ
==============
ကျောက်ဖြူမြို့မှ ကားမိုင် ၃မိုင် ၃ဖာလုံအကွာ ကျောက်စွယ်တစ်ခု၏ မြောက်ဖက်မျက်နှာစာတွင် ထွင်းထုတည်ထားသည်။ မူလက တစ်ဂူတည်းသာ ဖြစ်သော်လည်း နောင်တွင် ကုသိုလ်ပွားယူကြသဖြင့် ဂူပေါက်များလာလေသည်။ယခု ဂူအရှည်မှာ( ၃၉၄ )ပေရှိပြီး ဂူပေါက် ( ၅၄ ) ပေါက် ရှိသည်။
(၂)#နတ်တောင်ပြင်ဂူ
=============
ပေါက်တောမြို့၏ မြောက်ဖက်အနီးတွင် တည်ရှိသည်။ကျောက်သားနုလှသဖြင့် လက်ရာကောင်းမွန်ခြင်း မရှိပါ။ ယခုအခါ လမ်းဖေါက်လုပ်ရန်အတွက် အစိုးရကိုယ်တိုင် ဂူ၏အနီးဝန်းကျင်ရှိ ကျောက်တောင်ကို မိုင်းခွဲမှုများပြုလုပ်နေသည် ။
(အရေးထား ပြုပြင်ထိန်းသိမ်းသင့်ပါသည်)
(၃)#တောင်ညိုဂူ
===========
ပေါက်တောမြို့နယ်၊ တောင်ရင်းအရပ်တွင် တည်ရှိသည်။ပေါက်တောမြို့မှ အနောက်ဖက် လေးမိုင်အကွာ ၂၂၄ပေမြင့်သော သီးခြားတောင်လွတ် ကျောက်တောင်ကြီး ဖြစ်သည်။အနောက်ဖက်နံရံ၌ ပေ၁၆၀အရှည်တွင် ဂူပေါက်(၄၂)ပေါက်ကို ထွင်းထုထားသည်။ဂူများထဲတွင် ဆင်းထုတော် ကြီး/ငယ် (၆၈)ဆူ ကိန်းဝပ်နေကြသည်။မူလက ဂူတစ်ဂူတည်းသာ ဖြစ်သည်။ဤဂူကို စိတ္တရလင်္ကာ လက်သမားငါးရာတို့က ထွင်းထုခဲ့သည်ဆို၏။
(၄)#ကြိမ်ခွေမော်ဂူ
============
တောင်ရင်းကျွန်း၏ အနောက်ဖက်ခြမ်း ကြိမ်ခွေမော်ရွာတွင် တည်ရှိသည်။ ဤဂူအနီးရှိ တောကျောင်းတွင် `မဟာကျန်´ ဆင်းထုတော်တစ်ဆူ ကိန်းဝပ်လျှက် ရှိပါသည်။
(ဤဂူသို့်သွားရောက်ဖူးပါသည်။ ပြုပြင်ထိန်းသိမ်းမှု အားနည်းသဖြင့် ပျက်စီးမှုများ ဖြစ်နေပါပြီ။အရေးထား ပြုပြင်ထိန်းသိမ်းသင့်ပါသည်)
(၅)#ဂူဝဂူ
=======
ပုဏ္ဏားကျွန်းမြို့ အရှေ့ဖက်နှစ်မိုင်ခန့်အကွာ၊ ကုလားတန်မြစ်၏ လက်ဝဲကမ်းရှိ တောင်/မြောက် တန်းနေသော ကျောက်စွယ်ကို ဂူကျောင်းအဖြစ် မင်းဘာကြီးက စတင်တည်ခဲ့သည်။နှောင်းခေတ်တွင် ထပ်မံကုသိုလ်ပြုကြသဖြင့် ဂူပေါက်(၁၁)ပေါက်ထိ ဖြစ်လာသည်။ ဂူမျက်နှာစာအရှည် ( ၈၃ ) ပေရှိကာ၊ ဂူလမ်းအရှည်မှာ ( ၇၄ ) ပေရှိသည်။အချို့ဂူပေါက်တို့တွင် `တံကဲ´လက်ရာများ ပါရှိသည်။မြောက်ဖက်အနီး တောင်ထိပ်ပေါ်တွင် စမြုံတော်စေတီ ကိန်းဝပ်သည်။
(၆)#ဇီးကိုင်းဂူ
=========
ဇီးကိုင်းဟုလည်း ရေးကြသည်။ဇကိုင်းရွာသည် မစဲကျွန်း၏ အရှေ့တောင်ပိုင်းတွင် တည်ရှိသည်။ ရွာ၏အနောက်ဖက်တောင်တန်းတွင် မင်းဘာကြီးတည်ထားသည့် ဂူတစ်လုံး ရှိသည်။ ယခင်က လူသူမသိသော်လည်း ယခုခေတ်မှာ ဘုရားဖူးသွားရောက်သူ / လေ့လာသူ သုတေသီများ ရောက်ရှိကြောင်း သိရသည် ။
(၇)#ကူတောင်ဂူ
===========
ကူတောင်ရွာ၏ မြောက်ဖက်တွင် တည်ရှိသည်။ ဂူဝများမှာ အရှေ့သို့ မျက်နှာပြုထားသည်။ ဂူမျက်နှာစာတွင် ပန်းနွယ်ပန်းခက်များ၊ ကျေးငှက်သာရကာများနှင့် ဗြဟ္မာတို့က ပူဇော်နေကြပုံများ ထုဆစ်ထားသည်။ဂူကျောင်း(ဝ) သုံးခုရှိပြီး စုစုပေါင်း ( ၄၅ ) ပေမျှ ရှည်လျားသည်။ထိုင်တော်မူ (၃၁)ဆူကိန်းဝပ်လျှက် ရှိသည်။ မြောက်ဖက်ဂူမှာ အဓိကကျပြီး ဘုံပိတ်မျက်နှာကြက်နှင့် နံရံကပ်ကျောက်တိုင် သရုပ်ဖော်လက်ရာများ ပါရှိသည်။
မူလကုသိုလ်ရှင်မှာ မင်းဘာကြီးဖြစ်ပြီး ( ၁၅၅၃ )ခုနှစ် လေးဆူသော ရုပ်ပွားဆင်းထုတော်ကို တည်ခဲ့သည်။ ဤဂူကို ဒဏ္ဍာရီသမိုင်း၌ စိတ္တရလင်္ကာ လက်သမား၅၀၀သည် တစ်ညဉ့်တည်းနှင့် အပြီးထုဆစ်ခဲ့ကြသည်ဟု အဆိုရှိသည်။
(၈)#နိုင်ငံတောင်ဂူ
============
ဝရိုက်တော်(ဦးရာဇ်တောင်ဓာတ်)စေတီ၏ အနောက်ဖက်အနီးရှိ `နိုင်ငံတောင်´တောင်တန်းတွင် တည်ရှိသည်။ဂူပေါက် တစ်ပေါက်သာ ရှိပါသည်။
(၉)#ပိုးရှီပြင်ဂူ
=========
ပိုးရှီပြင်ရွာအနီးရှိ ဂူပေါက်တစ်ပေါက်တည်းရှိ ဂူဖြစ်ပါသည်။ပိုးရှီပြင်သည် ပုဏ္ဏားကျွန်းမြို့နယ်ဝင် ဖြစ်ကာ၊ တောဖျားချောင်း၏ လက်ဝဲကမ်း၊ ချောင်းဝမှဝင်လျှင် လေးမိုင်ခန့်အကွာတွင် တည်ရှိသည့် ရွာကြီးတစ်ရွာ ဖြစ်ပါသည်။
(ဤပိုစ့်ကို ဖတ်ရှူမိသူများတွင် ဖော်ပြပါဂူများ၏ ဓာတ်ပုံများရှိပါက မည်သည့်ဂူဖြစ်ကြောင်းကို ရေးသားဖော်ပြရင်း ဖိုတိုကွန်မန့် ပေးခဲ့ကြပါ။ အောင်လှသိန်း၏ ရခိုင်သုတအဘိဓာန်စာအုပ်မှ မျှဝေပါသည်။)
Credit…
No comments:
Post a Comment