************************************
ဝေသာလီမြို့ဟောင်းမှ ကျောက်စာဝန် ဦးစံရွှေဘု ရှာဖွေတွေ့ရှိသည်။
ခေါင်းလောင်းပတ်လည် (၁၈)လက်မခန့်၊အမြင့် (၉)လက်မခန့်ရှိသည်။
ခေါင်းလောင်းပတ်လည်တွင် စာနှစ်ကြောင်းရေးထိုးပါရှိသည်။ စာလုံးအချို့ ပျက်စီးနေသည်။
ရေးထိုးထားသည့် ဘာသာမှာ ပါဠိ သက္ကတရော ဖြစ်သည်။
အက္ခရာများကို ခန်းမှန်းချက်အရ ဂုပ္ပတခေတ် အေဒီ- ၅-၆ ရာစုခေတ် ဖြစ်သည်။
ခေါင်းလောင်းပါ စာ၏ အဓိပ္ပာယ်
=================
[ဘူပ(တိ)-ရေမြေသခင် ပြည်ရှင်မင်းသည်၊ အနုတရ -အတုမရှိသောမြတ်စွာဘုရား၏ ၊ ဓမ္မာယံ-တရားတော် ပိဋကတ်များအား ၊ဒေယြ-ပေးလှူခြင်း၏၊ ပုညံတဒ်-ကုသိုလ်ကောင်းမှုသည် ၊ ပုဗ္ဗင်္ဂမံ- ရှေးရှေးက တော်စပ်ခဲ့ သော ၊မာတာပိတ- ဖမည်းတော် မယ်တော်တို့အားလည်းကောင်း၊(အာ)စယျ - ဆရာသမားများ အတွက်သည် လည်းကောင်း ၊ ဘ၀တု ဖြစ်ပါစေသ တည်း။ ၊သဗ္ဗတာ-ခပ်သိမ်းကုန်သော၊ ဇနာ-လူတို့အားလည်းကောင်း ၊ ဣတိ -ဤကုသိုလ်ကောင်းမှုကို ၊ကတွာ ပြုလုပ်သည်။]
**
ဤခေါင်းလောင်းပါ စာအရ ဝေသာလီပြည်ရှင်မင်းတစ်ပါသည်။ အမိအဖ ၊ဆရာသမားတို့အား ရည်မှန်း၍ မြတ်စွာဘုရားရှင်၏ အတုမရှိသော တရားတော်ပိဋကတ်များကို လှူဒါန်းသည့်အကြောင်းကို ရေးထိုးထား သည်။ ယင်းအပြင် အလုံးစုံသော လူအပေါင်းတို့အားလည်း ဤကုသိုလ်ကို အမျှရကြစေရန် ပြုလုပ်သည်ဟု ရေးထိုးထားသည်ကိုတွေ့ရသည်။
***
ဘုရင်းမင်းသည် မြတ်စွာဘုရား၏ ပိဋကတ်တော်များကို လှူဒါန်းသည့်အခါ အခြားသော ပိဋကတ်တော် အလှူကမ္ဗည်းစာများ ရေးထိုးသကဲ့သို့ ကျောက်တွင် မရေးထိုးဘဲ ကြေးခေါင်းေ လာင်းပြု လုပ်ကာ ရေးထိုးထား သည်မှာ အလှူရှင်မင်း၏ စိတ်ကူးစိတ်သန်း ကောင်းမွန်မှု တစ်ခုပင်ဖြစ်သည်ဟု ယူဆနိုင်သည်။
သာဓုအနုမော ဒနာ ခေါ်ပြီး အမျှအတန်းပေးဝေသည့်အခါလည်း တစ်ပြိုင်တည်း ကြေးစည်သံကဲ့သို့ ခေါင်းလောင်းသံထိုး၍ သာဓု ခေါ် အမျှဝေနိုင်လေသည်။
****
ခေါင်းလောင်းပါ စာများကို မိမိတတ်သလောက်မှတ်သလောက်လေးဖြင့် ရသလောက် အဓိပ္ပာယ်ဖော်ထုတ်ထားခြင်းသာဖြစ်ပါသည်။ ကွဲလွဲမှုများ ရှိကောင်းရှိနိုင်သည်ဟု ၀န်ခံပါသည်။ ယင်းအပြင် ခေါင်းလောင်းပါ တစ်ချို့သော စာလုံးများ၏ အဓိပ္ပာယ်ကို ပြည့်စုံအောင် မဖော်ဆောင်နိုင်ခဲ့ပါ။ တတ်သိကျွမ်းကျင်ပညာရှင်များ ဆက်လက်ဖော်ထုတ်ကြပါကုန်။
မောင်ဖြူ (ကြွီတဲကျွန်း)
No comments:
Post a Comment